【折磨自己】不停同自己講對唔住 鄧穎芝有咩放唔低?



鄧穎芝今日同徐浩到商台宣傳新歌。
鄧穎芝(Van仔)同徐浩今日喺商台宣傳新歌《以前的我們》,Van仔話幾年前經歷過好唔開心嘅日子:「嗰時每晚喊、乜都冇興趣,真係懷疑自己係咪有情緒病,於是我去睇催眠治療。催眠嗰陣,我見到自己,不停同自己講對唔住同埋狂喊,治療師話我對一個人、一件事放唔低,喺度折磨緊自己,所以我會同自己講對唔住。」佢話新歌係希望大家,遇到唔開心嘅事,可以輕輕同自己講對唔住。

問Van仔重提嗰個令佢咁傷心嘅人會唔會再次傷心?佢坦言有諗過應唔應該分享:「我唔想人哋覺得我消費情緒病,但我同一個女仔朋友講,佢聽完首歌之後感動到喊,原來我真係可以感動到人。」
為佢新歌擔任監製嘅徐浩,都有試過催眠治療:「我都係因為啲感情問題,真係可以令我放低咗段感情。」另外,有傳鄧月平同香港拳王風之子杜恒霖同居,問到Van仔可知此事,佢話:「我打拳嗰陣,有去過杜恒霖個拳館,不過冇見過鄧月平去呀,同居?我真係唔知。」佢仲講笑話幫大家八卦吓佢地嘅戀情添。

(苹果日报)

[4798425]

Facebook Comments