【女友鼻骨裂】余香凝係咪破相?陳家樂:好驚慌!見佢流晒血




余香凝剛才喺Instagram貼出傷勢相,右面顴骨黐咗大膠布
家樂揸福士golf被撞凹
余香凝(Jennifer)噚晚坐男友車,發生車禍,塊面受傷、鼻骨裂,今日喺facebook「報平安」,余香凝剛才喺Instagram貼出傷勢相。

陳家樂今日喺電話表示:「噚晚做完嘢接佢收工,我哋傾緊喺邊度食嘢,突然間後面架車收唔切掣撞埋嚟,跟住推咗我架車埋壆,後面撞完到前面再撞,之後爆晒氣袋,嗰時都唔知發生乜事,大家都有幾秒冇咗意識!清醒番見佢塊面有啲損咗,又流鼻血,自己開車門時,發現自己頸椎有少少痛,對方司機即刻過嚟問有冇事,佢都算好人,好細心安排call車、傾賠償,帶我哋去醫院,佢都好負責任。」到醫院接受檢查後,家樂話:「女友鼻骨裂,我頸椎有少少拉到,同埋附近肌肉發炎,算好彩,大家手手腳腳都冇事,不過佢塊面有少少傷勢。」問女友係咪破相?家樂話:「有幾個瘀,右面顴骨黐咗大膠布,擔心有疤痕,佢呢排要停工.要好好處理呢件事,最擔心驚佢出席金像獎可能會帶住傷痕,希望佢唔會啦!自己今日開工,要食止痛藥,過兩日覆診。」家樂又話自己揸福士golf,唔係新車,唔記得係12定13年,朋友讓畀佢,佢話:「第一次發生撞車,好驚慌!見佢流晒血,要冷靜處理,好彩撞到我哋嘅車主係負責任嘅人,即時了解,冇話走咗去,佢一行過嚟就話自己嘅錯,佢話自己收掣唔到,知道自己開得太快,所有賠償佢會做足。」萬一女友真係破相,都會娶佢?家樂話:「當然啦,一定會照顧佢,呢段期間會搵去疤秘方。呢件事真係經歷生死,發現生死真係一瞬間,因為如果佢撞我哋,如果唔係撞壆,而係再推前撞入丫叉位,真係會入晒去,因為嗰度係高速公路,後面避唔到會直接撞落嚟,真係好彩!」噚日上水有一單撞車自焚,家樂仔話:「係呀,其實時間差唔多,我哋大約9點幾發生,去到醫院睇到呢單新聞。」

(苹果日报)

[4788175]

Facebook Comments