TBC ti disambut begulai ngemeranka konsep 1M

Kena nerenak runding sida rebak baru ngetanka pengelikun ba menua ti diuan pupu raban bansa

// Dikarang Judan Bungap //

SELAMAT TAUN BARU CHINA: Lau (lima kanan) enggau bala bukai begambar kenang enggau sekeda ari nembiak Tadika Yakin Diri maya pengerami nya ditu, kemari.

SIBU: Pengawa pupu raban bansa begulai nyambut Taun Baru China (TBC) besai reti dikena ngemeranka konsep 1Malaysia (1M) ti deka nempa penegap pengelikun bansa.

Presiden YMCA Sibu Temenggung Datuk Vincent Lau Lee Ming madah, ulah tu mega beguna bendar dikena nyeliahka penyerekang ti nyadi ba bansa ke enda sama ngambika pemansang menua tu semampai ulih ditumbuhka.

“Pengerami hari besai baka tu nyadi awak ke manah dikena kitai ngembing rebak baru sayauka pengelikun enggau pengelantang pengidup ba menua ke diuan pupu bansa tu.

“Tu mega awak dikena kitai semak agi begulai enggau pangan diri,” pia ku iya maya pengerami mantar Taun Baru China Tadika Yakin Diri YMCA di Taman Permai ditu, kemari.

Ambi ke banding ku Lau, Tadika Yakin Diri semampai ngintu Taun Baru China begulai enggau pangan diri ari pupu raban bansa ba tadika nya ninting taun.

Ku iya, tu chara ke engkeman dikena ngembing nembiak ari umur ke biak nemu sayauka pengelantang pengidup begulai enggau pangan diri.

“Tadika tu nyadika chunto ke manah laban kelimpah begulai nyambut Taun Baru China pengerami tu mega meri awak ngagai bansa bukai nyemetak agi nemu adat bansa China,” ku iya madah baru.

Berebak enggau tu mega, Lau madahka diri berasai lantang ati laban apai indai nembiak Bumiputera andal nganjung anak sida ngagai tadika nya taja pan pelajar dia bepelasarka jaku China.

“Tu mega seiti ari chunto ke manah ngagai kitai di Sibu ditu.

“Seraya nya, kitai deka madah, pengajar ke ngajar ba tadika tu endang ngembuan tikas pelajar ke chukup dikena nentuka nembiak ditu bulih pelajar ke meruan sereta betikas tinggi,” pia ku iya nambah.

Kelimpah ari nya, Lau mega minta bala apai indai nyungkak ke agi kerejasama enggau pangan diri dikena nentuka tadika nya semampai bulih pemujur.

“Nyangka taun 2017 tu meri penguji ke sebaka baka taun seiti suba.

“Nya alai kitai meseti bekempit enggau pangan diri ngambika anak kitai bulih pelajar ke manah ba tadika tu,” ku iya ngelalau.

Sama bela datai maya tu iya nya Mandal Presiden YMCA Sibu Robert Lau Hui Yew, raban direkter YMCA Sibu Wong Ei Sing enggau Kepala Pengajar tadika nya Teresa Lau.

(BorneoPost online)

[4566379]

Facebook Comments