Lima sekula primari di pelilih Sebauh mengkang ditutup ketegal ampuh bah

PALAN DIAU PENGAJAR: Kuarters pengajar ba SK Kuala Sigu udah ampuh ai.

BINTULU: Lima buah sekula primari di Pelilih Sebauh mengkang ditutup ketegal penusah ampuh bah lalu urung 522 iku nembiak enda besekula dalam kandang tiga hari tu ti udah.

Lima buah sekula ti napi penusah tu iya nya Sekula Primari (SK) Kuala Binyo ti bisi 47 iku nembiak sekula, SK Kuala Sigu (26 iku nembiak sekula), SK Bukit Mawang (47 iku nembiak sekula), SK Sg Genaan (38 iku nembiak sekula) enggau SK Bukit Balai (364 iku nembiak sekula).

Pemesai Pelilih Sebauh Desmond Douglas Jerukan madah lima buah sekula tu mengkang ditutup kemari ketegal laman sekula enggau jalai nya ampuh.

“Sehari tu (kemari) ai majak surut lalu nadai palan ngenduh bisi dibuka.

“Tang bisi sekeda peranak ba rumah panjai ke ba kandang menua ti baruh baka 19 pintu bilik Rumah Palos di Sungai Binyo enggau 12 pintu bilik Rumah Seman, kitai agi bejaga enti sema jalai ngagai rumah panjai tu putus ketegal ampuh bah, kitai udah nyikap diri enggau barang pemakai sereta perengka guna ninting hari ke bukai ungkup penusah ngenyit,” ku iya.

Taja pia, gaya di Sebauh agi ulih dipatau, ku iya, nadai sebarang palan ngenduh patut dibuka ke diatu tang semua ejensi bekaul endang nyikap diri napi sebarang pekara ke deka nyadi.

Penyanding Penemu Unit Pekara Nembiak Opis Pelajar Pelilih (PPD) Sebauh, Stanley Oliver Tinggie madah ai bah di SK Bukit Balai udah surut tang sekula tu mengkang ditutup ungkup pengawa meresi.

Ba lansa ke bukai, Pemesai Pelajar Tatau, Mohadi Mobin madah ai bah ba SK Nanga Penyarai udah surut enti banding hari ke dulu tang sekula tu mega mengkang ditutup.

(BorneoPost online)

[4566380]

Facebook Comments