Datai 100 peratus ke sekula ngambika enda tinggal dalam pelajar: Ismail

// Dikarang Rengenyan Labang //

KUCHING: Nembiak Primari Satu diperansang datai 100 peratus ke sekula ninting hari ngambika enda tinggal dalam pelajar, pia ku Kepala Pengajar Sekolah Kebangsaan (SK) Semerah Padi, Jalan Depo, Ismail Ibrahim, apin lama.

“Laban enti nembiak tu enda datai 100 peratus ke sekula dia nembiak tu deka tinggal dalam pelajar.

“Penatai ke sekula mega deka nambahka pengerindu enggau penegap runding ti deka bebakih sereta belajar ngenipakka diri enggau gaya belajar ba renggat sekula primari,” ku iya.

Ismail mansutka pekara nya lebuh bejaku ba ‘Majlis Penangguhan Program Transisi Tahun Satu 2017’ ke diatur ba sekula nya apin lama.

Program nya diatur pengelama tiga minggu ti dipasuk 146 iku nembiak Primari Satu sereta mayuh aktiviti ke udah dipejalaika nyengkaum sukaneka, licha pengelikun, bemain dalam tim enggau ke bukai.

Iya ngarapka program transisi sekula nya mujur lalu tejapaika pekara ti dijuluk.

“Nembiak patut nemu tuju program tu dipejalaika iya nya dikena ngenipakka diri empu enggau gaya kandang endur di sekula sereta bekelala enggau pengajar sida.

“Program tu diatur ngambika nembiak bekelala enggau pangan diri, iya nya bulih bakih baru ti sama umur ba sekula baru.

“Ngarapka tuju enggau juluk program tu ulih dijapai sereta dikemeranka nembiak pengudah program tu ditangguhka,” ku iya.

Kelimpah ari nya, dalam jaku pengelalu, Penyelaras Program, Amy Sophiani Adeni meri terima kasih ngagai sukung enggau kerejasama bala pengajar senggau piak pentadbir, sepemanjai program nya diatur.

Iya madahka nembiak Primari Satu nya gaga amat maya sida belajar sereta deka bebakih taja pan bisi sekeda ke agi enggai tinggal ari apai indai maya besekula.

“Semanjai tiga minggu program transmisi diatur, bala pengajar enggau nembiak Primari Satu udah ngasaika sebengkah proses ke dikelala kitai enggau nama bekelala, ke alai sida nguji deka ngerapitka takah entara sida,” ku Amy.

Nyerumba program nya mega bisi pemerindang baka belagu enggau tanda ari nembiak Primari Satu.

(BorneoPost online)

[4566383]

Facebook Comments