Masing mujur ngangkat sumpah nyadi Sapit Kepala Menteri

SIRU: Masing (kiba) nata ai ba tanah pendam niang Adenan.

KUCHING: Sapit Kepala Menteri ke mega Menteri Pemansang Infrastruktur enggau Perengka Pengangkut, Tan Sri Datuk Amar James Jemut Masing udah ngangkat sumpah pangku pengawa ba Astana ensanus.

Pengawa tu udah dikemata Tuai Megai Menua (TYT) Tan Sri Abdul Taib Mahmud enggau Kepala Menteri Datuk Amar Abang Johari Tun Openg.

Masing enda ulih ngenataika diri maya pengawa ngangkat sumpah bala kabinet nengeri Sarawak enggau menteri muda kena 19 Januari ketegal bisi komitmen ba menua tasik.

Sapit Kepala Menteri ke mega Menteri Betanam Betupi Moden enggau Ekonomi Menua Pesisir Datuk Amar Douglas Uggah Embas, Menteri Wang Kedua Dato Sri Wong Soon Koh, Menteri Raban Nembiak, Lumba enggau Penyerakup Dato Sri Michael Manyin Jawong, Menteri Kaunsil Kandang Menua Datuk Prof Dr Sim Kui Hian enggau Sekretari Nengeri Tan Sri Datuk Amar Morshidi Abdul Ghani antara sekeda bala ke bisi datai.

Pengudah nya Masing mega bisi ngabas pendam niang Datuk Patinggi Tan Sri Adenan Satem ba Pendam Islam Semariang ditu meri basa sereta besembiang.

(BorneoPost online)

[4566382]

Facebook Comments