SKMM patut neritka atur ba orang ti ngena media rama

Orang ti betenah perintah nengeri enggau perintah besai patut nerima ukum ari baruh ‘Akta Hasutan’, ku Wan Zain

MIRI: Komiti Komunikasyen Enggau Multimedia Malaysia (SKMM) dipinta bejalaika atur ke terit ba orang ti ngempu blog tauka sida ke nabur petenah nyabung laya perintah nengeri enggau perintah besai.

Aktivis Rama Komuniti, Wan Zain Syed Mohdzar madahka orang ti naburka petenah nya tau didawa ke lebih agi sida ti bejaika nama perintah.

“Kitai dekaka SKMM ngiga sereta nyidi orang ke nabur petenah ti ngasuh rayat enda lantang ati lalu ngukum sida ari baruh undang-undang ‘Akta Hasutan’,” ku iya madah ngagai Utusan Borneo kemari.

Isu ke benung dikejaku diatu iya nya, Kepala Menteri Datuk Amar Abang Johari Tun Openg bisi madah ngagai Menteri Besai Datuk Seri Najib Razak bekaul enggau atur mulaika hak ngagai Sarawak.

Kelimpah ari nangguhka atur mulaika hak ngagai perintah nengeri baka ke udah bisi dalam Sempekat Malaysia 1963, berita tu mega madahka Abang Johari sedia numbuhka perintah menua Sarawak nyema pinta enda diterima.

Ngelansa silik, Wan Zain madah berita ke dikerembai nya enda beradat ke lebih agi lebuh Abang Johari baru aja bejalaika pengawa nyadi Kepala Menteri.

“Tu pengawa sekeda orang ti nguji deka ngeruga kaul kededua piak entara perintah nengeri enggau perintah besai lalu kitai ngarapka sida ke naburka petenah tu kena tinggang atur ke terit,” ku iya nerang.

Nitih ku iya, perintah Sarawak endang minta hak baka ke udah dipejalaika niang Datuk Patinggi Tan Sri Adenan Satem ke diatu ditampung Abang Johari.

Taja pia, peminta nya nadai kaul enggau isu pansut ari Malaysia baka ke dipadah orang ti mai berita selebubu ngapa tu ti musinka penerang dikeluarka Abang Johari.

Tambah mega ku iya, Opis Kepala Menteri nyangkal Kepala Menteri kala mansutka jaku bansa nya lalu tu berita ti ulih ngarukka pemanah nama Sarawak enggau Perintah Besai.

(BorneoPost online)

[4566347]

Facebook Comments