JKKK dilalau nyingkang seriris enggau pemansang

SARIKEI: Komiti Pemansang enggau Pengelikun Genturung Pendiau (JKKK) patut nyingkang setriris enggau pemansang enggau gaya ke diatu ngambika peranak menua genturung pendiau enggau rumah panjai ke ari baruh payung JKKK bela ulih ngasaika pemansang ti diberi perintah nengah komiti nya.

Sekretari Politik Kepala Menteri, Teng Ung Woo madah, JKKK patut ngenegapka agi sistem bejalaika pengawa ba renggat genturung pendiau enggau rumah panjai ngagai siti sistem ke sistematik agi sereta teatur.

“Batang pengawa JKKK tu beguna amat. Sida ke dipilih nyadi kaban dalam JKKK, sekalika ari renggat ti pemadu tinggi nyentuk ke kaban bukai patut ngembuan penemu sentang pemansang diatu ti nyadi ngelingi enggau ari luar menua sida.

“Nengah chara nya, baru JKKK ulih nyingkang sereta besemekih enggau JKKK ke bukai ke lebih agi ba pengawa ngulihka penerang enggau informasyen ke tau dikunsi ngambika ulih dikemaju lalu meri pemaik ngagai semua,” ku iya.

Teng bejaku mu nyi nya ba Pengawa Mit Nyuaka Insentif Pelajar ngagai bala anak kaban JKKK Jalai Langsat ditu, bedau lama udah.

Program nya udah diatur ba Bilik Aum JKKK Jalai Langsat.

Ku Teng, semua orang patut besaup nentuka penanggul disiplin nembiak di sekula ulih diseliah tauka dikurang berindik ari penanggul disiplin di menua kitai majak balat nyadi diatu.

“Ba sesebuah menua ti diuan pupu raban bansa, jalai pengarap, jaku enggau adat, pelajar mih nyadi batang chara dikena nempa rebak baru ti ulih berunding sereta ngembuan pengelebih nguna penemu dikena napi pemar jemah ila.

“Semua orang mega bisi tanggungpengawa ke besai ba proses transformasyen sistem pelajar menua ngambika ulih nempa rebak dudi ti engkeman ungkup jeman sida,” ku iya.

Ku iya baru, kelimpah ari nempa sesiku ti sikar ngaul diri nyaup ngemansangka ekonomi bepemisi besai, raban pengajar mega patut ulih nempa orang ti ulih ngatika diri, ruang bilik enggau mensia mayuh.

“Ngagai nembiak rebak baru kami meransang sida ngambika nyadi kering, nakal sereta berani napi sebrang pemar dudi ila.

“Anang nyadi nembiak ti ngemusahka orang, bansa enggau menua, tang nya di mih nembiak ke penyanding menua enggau pelapis bansa,” ku Teng.

Sama bisi ngulu pengawa nya Chairman JKKK Jalai Langsat, Kutuk enggau Chairman Kandang Rukun Tetangga (KRT) Jalai Langsat, Patric Engkasan sereta urung 50 iku kaban enggau peranak ari kandang menua nya.

(BorneoPost online)

[4566344]

Facebook Comments