SRDC patut disilih ngagai nama Opis Pelilih Sibu

// Dikarang Judan Bungap //

SIBU: Opis Kaunsil Menua Pesisir Sibu (SRDC) tau disilih ngagai nama Opis Pelilih Sibu seriris enggau ubah pemansang ba pasar Sibu Jaya enggau Selangau ti dipegai baruh opis nya.

Chairman SRDC Kunsilor Sempurai Petrus Ngelai madah, langgur penemu iya tu dikena ngelaika opis nya megai kuasa enggau servis ke besai ngagai mensia mayuh.

“SRDC patut dipeda kitai sebuah opis kaunsil pelilih menua enggau kandang mengeri tang ukai semina opis kaunsil menua pesisir aja.

“Tu mih maya ke engkeman ke alai kitai nginsil ‘menua pesisir’ ngagai Opis Pelilih Sibu,” pia ku iya maya bejaku ba Pengerami Makai Lemai ‘Appreciation’ SRDC ditu, lemai kilah ensana.

Ku Sempurai, SRDC ke ditumbuh kenyau ari taun 1940 dulu diberi nama ‘Dayak Local Authority’ ti betuaika Penghulu Imai.

Udah nya, maya ke dipegai koloni British, nama nya ditukar ngagai ‘Local Authority Sibu’ sebedau SRDC.

SRDC diatu megai empat bengkah menua ba Kunsil Nengeri (DUN) iya nya Bawang Assan, Dudong, Tamin enggau beberapa bengkah endur di Kakus, Nangka enggau Bukit Assek.

Nambahka nya, ku Sempurai, pemesai menua ke dipegai tu mandangka SRDC nyauka sama baka megai sitak menua.

“Tang, ari baruh Ordinan Pihak Berkuasa Tempatan semina tiga iti aja renggat opis kaunsil iya nya ‘Majlis Bandaraya,’ ‘Majlis Perbandaran’ enggau ‘Majlis Daerah,” ku iya.

Taja pan baka nya, iya madahka SRDC naka alah ngangkatka tikas servis sida taja bisi bepenanggul ba pekara belanja enggau penyampau tubuh pengereja pengawa.

Ba pekara bekaul, Sempurai mega madah, ba kandang enam bulan keterubah, raban sida dalam SRDC mujur datai ba Tikas Pemanah Gawa (NKRA) ungkup 2016.

Nitihka statistik ari bulan September 2016 nyentuk November 2016, opis sida bisi nerima 170 iti ripot ari kunsilor tauka mensia mayuh.

“Ari penyampau nya, 120 iti udah diputarka lalu 40 iti benung diadu kelimpah 10 iti ripot ke digaga nya dipegai ejensi ke bukai,” pia ku iya nerang.

(BorneoPost online)

[4566351]

Facebook Comments