Memorandum PM, PG deka tembu enda lama agi

Pengudah disukung semua pesereta resolusyen nya deka dituku lalu dianjung ngagai Kepala Menteri

// Disalin Ari Churchill Edward //

KUCHING: Seraban bala intelektual Dayak enggau ketuai Gerempung Ukai Dikuasa Perintah (NGO) Dayak arap endar sida ulih mutuska memorandum ke dianti-anti dikena mutarka isu bekaul enggau hak tanah Adat Bansa Asal (NCR) sida ba tanah Pulau Galau enggau Pemakai Menua.

Memorandum tu deka dianjung ngagai Opis Kepala Menteri pengudah disukung pesereta ke datai ngulu Forum Tanah NCR kena 7 Januari 2017 diatur ba sebuah hotel ditu.

Nitih ku pengari raban nya, Dr Charlie Dudang, iya ngarapka memorandum nya deka tembu enda lama agi pengudah sida baum sehari tu (26 Januari) ba Lorance Lai Corner Cafe di Batu 4 1/2, Jalai Kuching – Serian ditu.

“Aku nesau semua orang ke landik (SME) pasal pekara tanah enggau Adat Dayak ngulu aum tu nyukung sereta ngenukuka memorandum tu. Raban SME tau datai ari bala luyar, orang ti niri negika NCR enggau orang ke landik pasal Adat. Semua endang diperansang datai,” ku iya lebuhka dikerandau kena lemai Hari Dua.

Raban tu mengkang ngembuan runding ke positif ba perambu ngagai perintah nengeri berindik ari timbal Kepala Menteri ke baru dipadu Datuk Amar Abang Johari Tun Openg ti deka berandau enggau bala ketuai Dayak pasal pekara nya.

Tu berindik ari penerang ari dua iku Sapit Kepala Menteri Datuk Amar Douglas Uggah Embas enggau Tan Sri Datuk Amar Dr James Jemut Masing ba dua bengkah program ke bebida, ke alai seduai mega deka berandau enggau Abang Johari pasal isu nya enda lama agi.

Kena 7 Januari, Forum Tanah NCR sepakat ke alai sida patut ngaluska agi langkar resolusyen sida ngambika memorandum nya silik agi dibantai ngagai perintah nengeri.

Taja pia, pengawa ngaluska memorandum nya ditangguh kena 7 Januari pengudah disalah anggap sekeda orang puntan ketegal bala pesereta forum nyapai sempekat.

Raban tu enda nimbal sentang penyaru penemu mensia mayuh tang beratika nya pekara ti manah. Taja pia bala pesereta ari Serakup Dayak Iban Sarawak (SADIA) madah, sida madahka diri enda setuju enggau langkar resolusyen nya laban sida patut beratika dulu isu nya sebedau ngulihka sukung resolusyen sereta nyuaka nya ngagai komiti pengatur forum.

Sebedau nya Charlie ke nyadi chairman pengatur forum nyamin semua langkar resolusyen deka dialus dulu sebedau dianjung ngagai Kepala Menteri, niang Datuk Patinggi Tan Sri Adrenan Satem. Taja pia, niang Adenan midang kena 11 Januari.

Forum 7 Januari udah digulu urung 300 iku pesereta ari bansa Iban,Bidayuh enggau Orang Ulu. Sekeda bala pesereta dipebasa ke bisi datai iya nya Kaban Parlimen (MP) Kapit Datuk Alexander Nanta Linggi, Kaban Kunsil Nengeri (ADUN) Bukit Goram Jefferson Jamit Ungat, ADUN Ba Kelalan Baru Bian enggau ADUN Krian Ali Biju sereta mega Sekretari Politik Kepala Menteri Sarawak Edwin Banta enggau Nicholas Kudi sereta bala ketuai raban bansa nyengkaum Datuk Paduka Anthony Nait, Sidi Munan, Datuk Anthony Nuek enggau Datu Ik Pahon Joyik.

Forum tu diatur berindik ari pemutus Kort Federal ti berengkah neritka atur ujung taun nyin tadi ke alai Pulau Galau enggau Pemakai Menua nadai dibungkur kuasa undang-undang. Nya alai, sekeda ari resolusyen raban Dayak minta perintah nengeri ngaku NCR tu.

(BorneoPost online)

[4566334]

Facebook Comments