Pengerami Muzik Peranak Tanah Tinggi Sarawak Ke-3 deka diatur 9-10 Disember

KOMITI PENGATUR: Bala komiti besai pengatur Muzik Peranak Tanah Tinggi Sarawak enggau Festival Tanda 2016 betuaika Dennis (duduk, lima kiba).

MIRI: Pelilih Mit Long Bedian sekali agi deka ngatur pengerami Muzik Peranak Tanah Tinggi Sarawak Ke-3 enggau Festival Tanda 2016 berengkah 9 ngagai 10 Disember 2016.

Taja jauh, festival sebedau tu ke diatur dalam taun 2008 enggau 2012 nyata teulihka pemujur enggau timbal ke chukup manah diterima ari peranak luar Long Bedian lalu beserimbai enggau festival, Long Bedian setipak enggau nama Peranak Tanah Tinggi.

Nitih ku komiti pengatur besai festival renggat nengeri ti betuaika Kaban Kunsil Nengeri (ADUN) Telang Usan, Dennis Ngau, batang tuju ngatur pengerami tu dikena nyedia pelasar ngagai pupu etnik di Sarawak mantaika pengelebih enggau pengaya main asal sida.

“Tu mega dikena meri sukung sereta kelai puji ngagai perintah nengeri seruran bejalaika pengawa dalam ngangkatka produk dagang temuai di nengeri tu, alai diatu ngemeratka agi dagang temuai ba menua pesisir.

“Pengerami tu deka nempa awak ngagai peranak menua pesisir nyereta sereta nambahka penatai pemisi ari dagang temuai nengah aktiviti ti deka matak penatai bala pengusung ari dalam enggau luar menua, lalu berebak enggau nya nempa kandang menua ti lantang endur diau,” ku iya nambah.

Tambah mega, festival taun tu deka berebak enggau ngintu genap taun keterubah bagi menua Apoh diangkat nyadi pelilih Mit bepalan ba Long Bedian.

Ku Dennis nampung, festival tu deka nyadi sebagi pakej pejalai ti manah ngagai temuai ke raun ngagai Taman Negara Mulu pengudah jalai belakin nyambung Miri-Long Lama-Long Bedian-Long Iman-Taman Negara Mulu tembu ila.

“Udah diputus festival tu deka diatur dua taun sekali sereta deka dipasuk dalam kalender pengerami dagang temuai di Sarawak.

“Tu prospek ti chukup manah laban beribu iku peranak menua pesisir ba sepemanjai jalai deka teulihka penguntung ari aktiviti dagang temuai,” ku iya.

Pia mega, bala temuai mega ulih bebelika produk asil pengelandik jari peranak menua nya kelebih agi ari komuniti Penan sereta bejalai ngagai menua ti dikerindu dalam kandang festival diatur baka tumpuk pendiau Penan, wong enggau ke bukai.

Menteri Dagang Temuai Sarawak deka bejadika festival tu kena 9 Disember 2016 sereta lebih ari 10 etnik ke besai di nengeri dipelaba bela deka mantaika tanda enggau muzik asal sida ba atas panggau dalam festival dua malam berunggu nya.

Festival tu diatur begulai Opis Menteri Dagang Temuai Sarawak, Palan Servis Telang Usan, Federasyen Gerempung Bansa Orang Ulu Sarawak Malaysia (FORUM), Federasyen Gerempung Bansa China, mayuh bengkah opis enggau ejensi perintah, Opis Temenggong Elizabeth Deng, Komiti Pemansang Enggau Pengelikun Genturung Pendiau (JKKK) Long Bedian, Pelilih Mit Long Bedian enggau Kaunsil Dagang Temuai Sarawak.

“Batang tuju kitai deka ngangkatka pengerami Muzik Peranak Tanah Tinggi Sarawak enggau Festival Tanda dudi hari sebaris enggau Rainforest World Music Festival (RWMF) ke dipun enggau mit lalu diatu udah ngerembai nyadi pengerami ti dikerindu di menua tu,” ku Dennis.

Penerang silik ulih betelefon nuju chairman komiti mit ngatur festival Jok Eng Jok ba lumur 013-8305962, Pemesai Pengereja Pengawa Sarawak (SAO) Ezra Uda (016-8867696) tauka Leslie Lah Anyie (013-8652215).

(BorneoPost online)

[4148391]

Facebook Comments